MOTU KEATEA (#10896)

Ke tigaina au, O toku Atua, ke pilipili atu au kia Koe, ke nofo au i loto i Tou alaai, i te mao mai ia Koe e fakavaaivai ne ia au.  Faka-malu aka au i lalo o te maluuga o kapakau o Tou alofa, me i te vela o toku nofo-mavae mo Koe, e liu-suavai iei a toku fatu. Taki atu au ke tai pili ki te vaitafe ko te ola patonu, auaa toku agaaga ko ka me se afi i te fia inu ona ko te salasala se gata kia Koe.  Oku mapuuga O toku Atua, e fakaasi mai a te kona o toku tigaina, mo oku loimata ne maligi e fakamaonia iei a toku alofa kia Koe.

Ko akai totuli atu au kia Koe, ki tavaeega ko la e tavae iei ne Koe a Koe eiloa mo te malu tela e fakamalu iei ne Koe a Ou Uiga Tonu, ke talia aka ko matou ke aofia mo latou ko la ko oti ne atafia ne latou Koe kae faka-maonigia Tou malo i Ou aso.  Fesoasoani aka kia matou ke inu, O toku Atua, mai i maikao alofa o te vai-ola o Tou alofa-kaimalie, kae fakapuli lele loa a mea katoa na ko Koe, kae ke mafuta fua mo Koe.  E maalosi Koe o fai a te mea e loto Koe ki ei.  E seai aka foki se Atua na ko Koe, ko te Mafi, te Fesoasoani i Mea faigata, ko te Ola ia Ia.
     Ke fakammalu a Tou igoa, O ko Koe Tela ko te Tupu o Tupu katoa!

-Bahá'u'lláh
-----------------------

MOTU KEATEA (#10897)

E malu silisili e o Koe, O Toku Atua!  Ko tuku atu kia Koe a fakafetai, me ko oti a Koe ne fakaasi mai kia au Tela ko te Asofou o Tou alofa, mo te Kamataga o te Ata-Ao o Tou alofa-kaimalie, pela foki ko te Fakavae o Tau Fakatokaaga. Au e akai totuli atu kia a Koe i Tou igoa, mai i mata o latou ko la e pili atu kia Koe ko masinasina, a ko loto o latou ko la e mautakitaki kia Koe ko kapakau atu olotou malaga kia Koe, ke talia ko te mea ko au, i taimi katoa mo nofonofooga katoa, ke puke mau ki Tou kafanoa, kae se fakapiki ki sose tino na ko Koe, kae ke tausi oku mata ke agi tonu ki te siku lagi o Tau Fakaasiiga, kae ke fai a mea ko la ko oti ne tusilima mai ne Koe mo au i loto i Au Tapeleti.
     Fakapei, o toku Atua, toku fuaitino mo toku agaaga ki gatu o Tou manakoga mo Tou alofa-kaimalie.  Tausi ke malu au, mai i sose mea tela e masei kii kia Koe, kae fesoasoani alofa mai kia au mo latou ko la e tino mai kia au ke fakalogo kia Koe, kae fakagata a sose mea tela e fakaala ne ia so se mafaufauga masei io me se manakoga matagaa ia au.
     Koe e tonu, te Aliki o tagata katoa, mote Pule o te lalolagi nei mot e sua lalolagi.  E seai aka se Atua na ko Koe, ko te Iloa-Katoatoa, ko te Atamai-Katoatoa.

-Bahá'u'lláh
-----------------------

MOTU KEATEA (#10898)

E maluga Tou igoa, O toku Atua!  O toku Atua! Au e fakamolemole kia Koe ki te pusaki gali o te Gatu o Tou alofa, tela mai i Tau Faka-tonuuga kae fano tonu mo Tou manakoga te la ne pusaki atu  ki te laloagi katoa, kae mai ite Fetu Ao o Tou finagalo ne pula maina, mai i te maalosi o Tou mafi mo Tou nofoaiga-a-aliki, mai i luga i te sikulagi o Tou alofa, o solo keatea mai i toku loto a mafaufauga e seai ne uiga mo fakatauga faka-supasupa, ko te mea ko toku alofa katoatoa ke fuli atu kia Koe, O ko Koe te Aliki o tagata katoa!
     Au ko Tau tavini mo te tama o Tau tavini, O toku Atua!  Au e piki-mau ki lima o Tou alofa kae taofi mau ki te kafanoa o Tou alofa atafai.  Fakaeke mai kia au a mea lei katoa ko la ia Koe, kae fagai mai au mai i te Taipola te la ne aumai ki lalo i loto i kaumana o Tou manuia mo te lagi o Au faka-manuiaaga. 
     Ko Koe, i te tonuuga loa, ko te Aliki o lalolagi, mo te Atua o latou katoa ko la i te lagi mo latou katoa ko la i te lalolagi.

-Bahá'u'lláh
-----------------------

MOTU KEATEA (#10899)

E uke a loto ne mokotia, O toku Atua, ko oti ne fakaka ki te afi o Tau Fakatokaaga, kae e tokouke a tino ne moe kae ne fago ne te suamalie o Tou leo.  E pefea foki a te tokouke a tino foou ne saala atu o lafi i te ata o te laku o Tou tafatasi, kae e pefea foki a tokouke o latou e fia inu ne saala atu ki Tau puna-vai ola i Ou aso!
     Fakamanuia kia ia te la ko oti ne fakavave a ia i tena auala kia Koe, kae fakavave ke maua ne ia a te Aso-Malulu o te mainaaga o Ou mata.  Fakamanuia a ia tela ne fakapalele tena alofaaga o fuli atu kite Malumalu-Kamata o Tau Fakaasiiga mo te Ulu-Puna-vai o Tau fakamaalosi.  Fakamanuia a ia te la ne fakamaumau ana mea i Tou auala a mea ko la ne fakaeke aka ne Koe mai iTou alofa mo au mea-alofa.  Fakamanuia a ia tela, i tena loto nnau kia Koe, ko otii ne pei keatea ne ia a mea katoa na loa ko Koe.  Fakamanuia a ia tela ne fiafia i te pili atu kia Koe, kae motu a ia mai i so se tino na ko Koe.
     Au e akai fakamaulao kia Koe, O toku Aliki, ko Ia Tela mai i Tena Igoa, a Ia, mai ite maalosi o Tou nofoaiga-a-tupu mo te mafi, ko oti ne sae aka ki luga mai i te sikulagi o Tou falepuipui, o fakeke mai mo tino katoa a Ou uiga totino mo feitu ko la e ttau mo Tou maluga
     A Tou Mafi, e tonu, e pau mo mea katoa
.

-Bahá'u'lláh
-----------------------

MOTU KEATEA (#10900)

Seiloa ne au, O toku Atua, me sea ate Afi tenei e fakaka ne Koe i Tou fenua.  A te lalolagi se mafai lele ne ia o pono tena mainaaga, io me ko te vai e mafai o fakagata a tena ulaaaga.  A tagata katoa o te lalolagi e see kafi o teke tena maalosi.  Sili i te lasi o te faka-manuiaaga o ia tela e fakapilipili kiei, kae lagona ne ia a tena ulaaga.
     A niisi, O toku Atua, ne fai ne Koe, mai i Tou alofa-maalosi, ke mafai o fakasae atu ki ei, kae ko naai tino e taofi mai ne Koe ona ko te pogai o mea a olotou lima ne fai i Ou aso.  Sose tino ko oti ne fakavave atu ke maua ne ia ko oti, i tena loto finafinau o taumata ki luga i Tou tauleleka, ko avatu a tena ola i Tou auala, kae fanatu ki luga ia Koe, aunoa mo se fakapiki lele loa ki se isi mea aka na loa ko Koe.
     E akai fakamaulalo atu au kia Koe, O toku Aliki, mai i te Afi te la e ula kae ka i te lalolagi o te foafoaaga, ke sae keatea a te veli tela e fakatuai ne ia au mai i te fakasae atu kit e nofoaga o Tou malu, mo te tu atu ite mataloa o Tou faitoa.  Fakaeke mai ne Koe mo au, O toku Aliki, mea lei ko la ne aumai ki lalo ne Koe i Tau Tusi, kae sa faka-pokotiagia au ke mao au mai ite lafiiga o Tou alofa.
     E maalosi Koe o fai a te mea e fiafia Koe ki ei.  E tonu, ia Koe ko te Maalosi-Katoatoa, ko te Toe-Kaimalie.

-Bahá'u'lláh
-----------------------

MOTU KEATEA (#10901)

Tavaeega e iluga ia Koe, O toku Atua!  Au se tokotasi o Au tavini, te la e talitonu kia Koe mo Au fakaasiiga.  E matea ne Koe me ko au ne saga tonu atu au pefea ki te mataloa o Tou alofa, kae fuli atu oku mata ki te kogaa-mea o Tou alofa-kaimalie.  Au e akai totuli kia Koe, i luga i Ou fakaekeega tafasili ite maluga mo Ou uiga lei tafasili i te malu, ke tala mai ki oku mata mataloa lasi o Au faka-manuiaaga.  Fesoasoani mai, ko te mea, ke fai te mea tela e onomea, O ko Koe Tela ko te Aofiaaga o igoa katoa mo uiga lei!
     Au e mativa, O toku Aliki! A ko Koe ko te Maumea.  Au ne tuku tonu oku mata kia Koe, kae fuli tua atu au mai i mea katoa na ko Koe.  Sa fakagata mai ia au, au e fakamolemole atu kia Koe, ite matagi iliili malie o Tou alofa atafai, kae sa fakagata mai ia au a mea ko la ko oti ne faka-malu ne Koe mo latou filifilia mai ia Au tavini.
     Kave keatea a te veli mai i oku mata, O toku Aliki, ko te mea ke matea ne au me ne aa mea ko oti ne finagalo ne Koe mo Au mea ola, kae maua i fakaasiiga katoa o Ou tugalima, a te fakaasiiga o Tou maalosi katoatoa.  Nikoi aka toku agaaga, o toku Aliki, ki Au failoga tafasili i te mafi, kae futi mai au keatea mai ite pooko o oku mafaufauga masei mo manakoga tiapolo.  Tusi aka ki lalo, mo toku lei i te lalolagi nei pela foki mo te sua lalolagi.  E maalosi Koe o fai a te mea e fiafia Koe kiei.  Seai aka foki se Atua i kona na ko Koe, ko te Malu-Katoatoa, te la Tena fesoasoani e sala ne tagata katoa.
     E avatu ne au a fakafetai kia Koe, O toku Aliki, me ne fago ne Koe au mai i taku moe, kae ne fakagasue mai au ki luga, kae faiite i au a te mafaufauga ke matea a te mea te la nese mafai ne taulasiiga o Au tavini o iloa.  Tela la, fai au ke mafai, O toku Aliki, o kilo mo te alofa mo Koe, pela foki mot e taku lei o Tou fiafiaaga, so se mea ko oti ne mafaufau ne Koe.  A Koe ko Ia tela Tena Mafi mo Tena puleega e molimau a mea katoa.  
     Seai aka se Atua na ko Koe, ko te Mafi-Katoatoa, ko te Fai Mea-Lei.

-Bahá'u'lláh
-----------------------

MOTU KEATEA (#10902)

I te Igoa o Tou Aliki, ko te Tofuga, ko te Tupu, ko te Lava-Katoatoa, ko te Maluga, Tela a Tena fesoasoani e salagagia ne tino katoa.
     Fai atu: O toku Atua! Ko Koe Tela ne faiite ne Koe a lagi mo te lalolagi, O te Aliki ote Nofoaiioga Malo!  E maina kii a Koe i mea lilo o toku loto, a ko Koe e see mafai lele o iloa vagana ko Koe tokotasi.  E lavea ne Koe so se mea ia au, kae e seai lele se isi e mafai ne ia o iloa vagana ko Koe.  Tuku mai kia au, e auala mai Tou alofa-kaimalie, ke mafai ne au o fakaseai a mea katoa na loa ko Koe, kae fakatonu mai mo au a mea ko la ka tu saoloto au mai I tino katoa mai tafa o Koe.  Fakasaoloto mai ke maua ne au a mea lei o toku olaaga i te lalolagi mo sua lalolagi.  Tala atu oku mata ki mataloa o Tou alofa kaimalie, kae mo te alofa silisili tuku ifo kia au a Ou alofaga atafai mo Au mea-alofa.
     O ko Koe Tela ko te Aliki o te alofa lauefa!  Fai a Tou tulaga faka-te-lagi ke fesoasoani kia latou ko la e alofa kia Koe, kae avatu ki luga ia latou a Au mea-alofa mo au mea.  Ke Tu Loa koe ia Koe mo matou, fakamagalo a motou agasala kae alofa mai kia matou.  Koe ko te Motou Aliki mo te Aliki o ma faiite katoa.  E seai aka foki e kalaga matou ki ei na ko Koe, io m eakai totuli matou ki ei nako Au mea-alofa.  Ko Koe te Aliki o ote lava i mea katoa mo te alofa kaimalie, e se lavea a Tou maalosi, a ko Toe masani i Au fakaasiiga.  E seai aka se Atua na ko Koe, ko Te Pule-Katoatoa, ko te tafasili ite Maluga.
      Fakaeke aka Au fakamanuiaaga, O toku Aliki, ki Faifekau, latou ko la mana kae olaga lei.  E tonu a Koe ko te Atua, ko te se-Fakatusagia, ko te Katoatoa ia Ia loa.

-The Báb
-----------------------

MOTU KEATEA (#10903)

O te Aliki! Kia Koe e fuli atu au mo se lafiiga, kae ko oti ne fakasino a toku loto ki Au fakailoga katoa.
     O te Aliki! Me ko au e fai-malaga io mee nofo ite fale, me i taku fakapotopotoga, io me ko taku galuega, a toku talitonu ko tuku katoatoa kia Koe.
     Tuku ifo ki au a Tou fesoasoani tumau ko te mea ke tu-saoloto au mai i meakatoa.  O Ko Koe Tela a Tou alofa e seai se ponooga o ia!
     Tuku ifo kia au a toku tufaga, O te Aliki, pela mo te mea e fiafia Koe kiei ko te mea ke lotomalie au i so se mea tela ko oti ne fakaeke mai kia au ne Koe.  
     A Tau fakatonuuga ko toe ikuuga fakaoti.

-The Báb
-----------------------

MOTU KEATEA (#10904)

Fai atu: Te Atua e lava i mea katoa, kae e seai se mea i lagi mo te lalolagi na ko te Atua e lava i mea katoa.  E tonu, a Ia i loto ia Ia, ko te Iloa, ko te Lava i mea Katoa, ko te Maalosi Silisili.

-The Báb
-----------------------

MOTU KEATEA (#10905)

O te Atua, toku Atua! Koe ko toku Fakamoemoega mo taku Fagasele, taku Kiloga mo toku Manakoga.  I se tulaga tafasili i te maulalo mo te fakapalelega o fakanuanaki e talo au kia Koe ke fai au pela me se leo o Tou alofa i Tou fenua, se moli o Tou poto i vasia o Au mea faiite, se fuka o te alofa faka-te-lagi i Tou malo.
     Faka-aofia atu au fakatasi mo Au tavini ko motu mai ia latou mo mea katoa na loa ko Koe, ko faka-mana latou mai i mea se tumau o te lalolagi nei, kae ko oti ne faka-avanoa latou mai i musumusuiga o leo o latou e nofo mo manatu seai ne aogaa.
     Ke fai toku loto ke liua ite fiafia e ui mai i te agaaga o te mautinoa tonu mai i Tou malo, kae faka-maina oku mata e ui mai ite lavea ne latou a agaaga o te fesoasoani faka-te-lagi ko olo ifo ki lalo taki-ta-tasi ki luga ia au mai ite malo o Tou matagofie silisili ese.
     E tonu ia Koe ko te Mafi-Katoatoa, ko te Silisili ese, ko te Maaalosi-Katoatoa.

-`Abdu'l-Bahá
-----------------------

MOTU KEATEA (#10906)

O te Atua, toku Atua, Fakafonu aka mo au ate ipu o te motu mai i mea katoa, kae i te lukuuga fakatasi o Tou gali mo mea-alofa, faka-fiafia aka au i te uaina o te alofa mo Koe.  Saoloto mai i manakoga mo fiafiaaga ote loto, motu gina mai au mai i fifiiga o te lalolagi ko teka atu, kae futi atu au mote lifu ki Tou nofoga maluga, kae fakafou au mai i vasia o tagata ki se manavaaga o Tou mana.
     O te Aliki, faka maina ne Koe oku mata ki molii o Au mea-alofa, faka maina ne Koe oku mata ke lavea ne latou a fakailoaga o Tou mafi-katoatoa; faka lifu ne Koe mo te matagofie o Tou poto tela e siomia i mea katoa, fakafiafia ne Koe toku agaaga ki Au tala e lifu i ei agaaga, O ko Koe te Tupu o te lalolagi nei mote malo mai i luga, O ko Koe te Aliki o te nofoga-malo mo te mafi, ko te mea ke mafai ne au o talai atu ki tua atu Au failoga mo au me fakanofoga, kae talai atu a Tau Fakatokaaga, kae atiake Tau talaiiga, kae tavini atu a Tau Tulafono mo Tau Muna tafasili ite mana.
     Ko Koe, e tonu, ko te Maalosi, ko Te Fai-Mea-alofa i taimi katoa, ko te Mafai, ko te Mafi-Maluga i mea katoa.

-`Abdu'l-Bahá
-----------------------

